काठमाडौं । भदौ १४ गतेदेखि प्रदर्शन तयारीमा रहेको फिल्म ‘वर एण्ड वधु’ले तीन नयाँ पोस्टर सार्वजनिक गरेको छ ।
सार्वजनिक पोस्टरमध्ये दुई पोस्टरमा अभिनेत्री आँचल शर्मा र डेब्यु एक्टर विवेक कर्माचार्यलाई रोमान्टिक अवतारमा देखाइएको छ । अर्को एक पोस्टरमा भने फिल्मका अधिकांश कलाकार अटाएका छन् ।
प्रदीप भारद्धाजको पटकथा लेखन रहेको फिल्मका कार्यकारी निर्माता डा. अमित रिजाल हुन् । एलआरके इन्टरटेन्मेन्टको ब्यानरमा निर्माण भएको फिल्ममा जानुका थापाको लगानी छ ।
फिल्ममा सुदिप बरालको छायांकन, मिलन श्रेष्ठको सम्पादन, साहिल खानको ट्रेलर, कविराज गहतराज र अनिसा स्याङ्देनको नृत्य, हिमाल केसीको एक्सन छ ।
फिल्मका दुई गीत सार्वजनिक भइसकेका छन् । रोमान्टिक कमेडी जनरामा निर्माण भएको यो फिल्मले बक्स अफिसमा सुखद व्यापार गर्ने अपेक्षा गरिएको छ ।
